అక్క నా కంటే తొమ్మిదేళ్ళు పెద్దది 294

మగ సంతానం కోసం మా వైద్యుడిచ్చిన మూలికల కషాయాలు ఎన్నో తాగారు. వాటి ఫలితమే కావచ్చు అక్క జననం.

ఎన్నో సంవత్సరాల నిరీక్షణ అనంతరం…

మగాడిలా పుట్టబోయి, చివరిక్షణంలో ఆడదానిలా భూమ్మీద పడింది అక్క.

దానికి తోడు, మగసంతానం పై మోజుతో, అక్కను మగాడిలానే పెంచారు. యుద్ద విద్యలూ, వేటా నేర్పారు. దానికి తగ్గట్టుగా అక్క కూడా సహజ నైపుణ్యంతో అన్నీచాలా శ్రద్దగా నేర్చుకుంది.

పేరు కూడా ‘శివంగి’ అని పెట్టుకున్నారు.

ఒక వేళ నాన్నకు మగ సంతానం కలిగేవరకూ, ఆ సంతానానికి యుక్తవయస్సు వచ్చేవరకూ ఆమెనే తదుపరి పెద్దగా నిర్ణయించారు. నాన్నకు అనారోగ్యం కలిగినా, దూరప్రాంతాలకు వెళ్ళినా, అక్కే గూడెపు పెద్దగా నాన్న బాధ్యతలు నిర్వహిస్తూ ఉంటుంది.

కానీ శివంగి వివాహం మాత్రం ఓ పెద్ద సమస్యగా మారింది. ఆమెను వివాహం చేసుకోడానికి మగాడే దొరకలేదు.

నాన్నకు ఇదో పెద్దసమస్యగా మారిపోయింది.

దానికి తోడు, నేనో ప్రక్క యుక్తవయస్సు కొచ్చేసాను. నా రూపూ, ప్రవర్తనా అక్కకు పూర్తి వ్యతిరేకం. నన్ను వివాహమాడడానికి యువకులు పోటీపడసాగారు.

కానీ ఎలా? అక్కకు పెళ్ళి కాకుండా నా వివాహమెలా?

పైగా, అక్కకు పెళ్ళి కాకపోతే, నన్ను పెళ్ళాడే వాడు తదుపరి గూడెపు పెద్ద పదవి కోసం అక్కతో పోటీ పడ వచ్చు.

తర తరాలుగా మా కుటుంబం కాపాడుకుంటూ వస్తున్న ఈ పదవి బయటి వారి చేతుల్లోకి పోవడం నాన్నకిష్టం లేదు. నాన్న కింకా పిల్లల్ని కనే వయసు మిగిలే ఉంది.

నాన్నకు నలభై ఏళ్ళు. తదుపరి సంతానం మగ బిడ్దేనని గూడెపు దేవత భవిష్య వాణి గా తెలిపింది.

తనకు మగ సంతానం కలిగేవరకూ, అన్ని అర్హతలూ ఉన్న అక్కనే గూడెపు దొరసానిగా నాన్న ప్రకటించేసాడు.