రిచర్డ్స్ కొంచెం కొంచెం రక్తం కోల్పోతూ ఆ ఎండ వేడికి అప్పుడో ఇప్పుడో అన్నట్టు ఉన్నాడు అలాగే నేల మీద.
రిచర్డ్స్ అరగంట నరకం అనుభవించాక ఒక తెల్లటి వాన్, అందులోనుంచి నలుగురు రిచర్డ్స్ మనుషులు చేతులు కట్టేసిన సౌరవ్ ఠాగూర్ ని తీసుకుని దిగారు.
హార్ధిక్ ఎప్పుడూ తన తండ్రిని అంత దైన్యంగా చూడలేదు. ముందు రిచర్డ్స్ మీద కోపం వచ్చినా తను చేసినదాంతో పోలిస్తే ఇది అసలు లెక్కే కాదని తమాయించుకున్నాడు.
రిచర్డ్స్ మనుషులు సౌరవ్ ని అప్పగించి తన దగ్గరకు వస్తుంటే వాళ్లనే చూస్తున్నాడు. వాళ్ళ కాళ్ళు మాత్రమే కనిపిస్తున్నాయి. అంతకు మించి తల ఎత్తడం తన వల్ల కావట్లేదు. వాళ్ళు చేరువగా వస్తున్న కొద్దీ కళ్ళు బరువుగా మూతలు పడుతున్నాయి. చివరిగా ఒక నలుపురంగు బూటుని చూస్తూ స్పృహ కోల్పోయాడు.
మూడు రోజుల తర్వాత కళ్ళు తెరిచి చూస్తే ఇదిగో ఇలా ఉన్నాడు.
పగ, ప్రతీకారం, అవమానం, భాధ, ఆవేశం ఇలాంటి రకరకాల భావాలతో రిచర్డ్స్ వొళ్ళు దహించుకుపోతుంది.
మెల్లిగా అతనికి తెలియకుండానే అతని కట్లన్నీ రక్తసిక్తంగా మారిపోయాయి. అది గమనించిన రిచర్డ్స్ అసిస్టెంట్ భయంతో “డాక్టా…ర్” అంటూ అంటూ గావుకేక పెట్టాడు.
హుటాహుటిన గదిలోకి వచ్చేసారు నలుగురు స్పెషలిస్ట్ డాక్టర్లు, పదిమంది నర్సులు, ఎంపీ రమానాథ్, రిచర్డ్స్ ముఖ్య అనుచరులు.
రిచర్డ్స్ ని వెంటనే బెడ్ మీద పడుకోబెట్టి స్ట్రెస్ రిలీజ్ చెయ్యడానికి ఇంజక్షన్ ఇచ్చారు. కొద్దిగా తగ్గింది రిచర్డ్స్ కి.
రిచర్డ్స్ బీపీ చెక్ చేస్తూ నార్మల్ అయ్యిందని నిర్ధారించుకున్నాక వాళ్లలో ఒక డాక్టర్ ” మిస్టర్ రిచర్డ్స్ మీకు తెలుసుకదా మీకు బాగా గాయాలయ్యాయని? ఇలా అయితే మీ ప్రాణానికే ముప్పు. ఒక నెల రోజులు గాయాలు మానేవరకు మీరు దేనికీ రియాక్ట్ అవ్వకూడదు. దయచేసి కొన్నాళ్ళు ప్రశాంతంగా ఉండండి” అన్నాడు.
“నో డాక్టర్ నో.. నేను అలా ఉంటే అంతా అయిపోతుంది. నేను ఓడిపోతాను. నా జీవితాశయం నెరవేరదు. ఒక పిల్ల కాకి చేతిలో నేను ఓడిపోతాను. ఎంత డబ్బు ఖర్చైనా నాకు లెక్కలేదు. నేను వెంటనే లేవాలి. స్పెషలిస్ట్స్ ని పిలిపించండి. ప్లీస్ డాక్టర్ ప్లీజ్.” ఏం చెప్తున్నాడో ఎలా చెప్తున్నాడో తెలియట్లేదు రిచర్డ్స్. ఊగిపోతున్నాడు.
వెంటనే బీపీ పెరిగిపోవడంతో డాక్టర్ ఇంకొక సూది వెయ్యాల్సివచ్చింది. “సీ మిస్టర్ రిచర్డ్స్. మీ కోసం రమానాథ్ గారు దగ్గరుండి ఉన్న స్పెషలిస్ట్ డాక్టర్స్ ని మీ కోసం నియమించారు. మీకు అంతగా తగ్గదు అనుకుంటే మీరు మీ దేశం వెళ్లి బాగుచేయించుకురండి. మాకు నష్టం లేదు. ఇండియాలో డబ్బుకు కొదువేమో కానీ ప్రతిభకు కాదు. అది గుర్తు పెట్టుకుంటే మంచిది. ఇంకొక్కసారి బీపీ పెరిగితే మీ ప్రాణాలకే ప్రమాదం. తర్వాత మీ ఇష్టం. రమానాథ్ మీరు అర్థమయ్యేలా చెప్పండి. ” అంటూ విసురుగా బయటకు నడిచాడు ఆ డాక్టర్. వెనకాలే మిగిలిన డాక్టర్లు.
“రిచర్డ్స్ ప్లీజ్…” అన్నాడు రమానాథ్ రిచర్డ్స్ భుజం మీద చెయ్యి వేసి.
“అవును.. కానీ ఆలోచిస్తా.. ప్రశాంతంగా.. మరింత ప్రశాంతంగా.. నన్ను కొంతసేపు వదిలెయ్యండి. నేను పిలిచే వరకు ఎవరూ లోపలికి రావొద్దు. డోర్ లాక్ చేసి వెళ్లిపో” అంటూ బెడ్ మీద కళ్ళు మూసుకుని పడుకున్నాడు రిచర్డ్స్ ఆలోచనల నిధి వైపు దారి తీస్తూ….
మొత్తం చీకటి..
“లైట్ వేయ్” మామూలుగా పలికింది హార్ధిక్ కంఠం.
చకచకా ఆ గది మొత్తం లైట్ల వెలుగు పరుచుకుంది.
గదిలో ఒక పెద్ద టేబుల్, చుట్టూ మూడు కుర్చీలు.
అందులో సౌరవ్, హార్ధిక్, మల్హోత్రా కూర్చుని ఉన్నారు.
చుట్టూ పూజా, హాథీ, టూటూ ఇంకొంతమంది మనుషులు నిలబడి ఉన్నారు.
“వెల్.. ఈ గేమ్ మొదలుపెట్టింది నేనే కాబట్టి నేనే మొదలుపెడతాను. టైం మెషీన్ తయారు చేయడానికి ఇప్పుడు నాకు రెండు సమస్యలున్నాయి.” అంటూ మొదలుపెట్టాడు మల్హోత్రా.
“ఒకటి.. సోర్సెస్. నాకు కావలిసిన మెషినరీ మొత్తం యూఎస్ మిలిటరీ సృష్టించి తయారుచేసి ఇచ్చింది. అలాగే నా సబార్డినెట్స్ మొత్తం చాలా నైపుణ్యం ఉన్న అనుభవజ్ఞులు. సో నాకు ఒక పది మంది తెలివితేటలు కలిగిన ఇంజనీర్స్, నాకు అవసరమైన సూపర్ కంప్యూటర్, ఇంకా నేను చెప్పే డివైస్ లు నాకు సమకూరిన సమయం నుంచి నేను రెండు నెలల్లో పని పూర్తి చేసి ఇచ్చేస్తాను.” చెప్పడం ముగించాడు మల్హోత్రా.
“నువ్వు చెప్పింది బాగానే ఉంది మల్హోత్రా. కానీ ఇప్పటికిప్పుడు పది మంది.. అది కూడా చాలా అనుభవం కలిగిన వాళ్ళు? జరిగే పనేనా?” తన సందేహం వెలిబుచ్చాడు సౌరవ్.
“జరుగుతుంది” మధ్యలో అందుకున్నాడు హార్ధిక్. మిగిలిన అందరూ అతనివైపే చూస్తున్నారు.
మల్హోత్రా వైపు సూటిగా చూస్తూ చెప్పడం స్టార్ట్ చేసాడు హార్ధిక్.
“నిజమే మీ వాళ్ళు మీతో సంవత్సరాల తరబడి పని చేసారు కాబట్టి మీకు ధీటుగా పని చేస్తారు. కానీ ఇక్కడ అలాంటివాళ్ళు ఎవరూ లేరు. నిజమే కానీ..” అంటూ ఆగాడు హార్ధిక్.
మల్హోత్రా మొహంలో చెప్పమన్నట్టు భావం కనిపించింది.
” ఇక్కడ టాలెంట్ ఉన్న వాళ్ళు చాలా మంది ఉన్నారని నా అభిప్రాయం. మీకు కావలిసిన విషయం ఉన్న వాళ్ళని ఇంటర్వ్యూకి పిలిచి సెలెక్ట్ చేసుకుందాం. వాళ్లకు పర్సనల్ గా మీకు కావలిసిన విషయం మీద 3నెలలు తర్ఫీదు ఇస్తే సరిపోదంటారా?” సూటిగా ప్రశ్నించాడు మల్హోత్రాని.
మల్హోత్రా అభినందనగా హార్ధిక్ వైపు చూస్తుండగా సౌరవ్ లేచి “అద్భుతమైన ఆలోచన. కొడుకు ప్రయోజకుడు అయినప్పుడు తండ్రికి కలిగే ఆనందమే వేరు మై సన్” అంటూ హార్ధిక్ ని గట్టిగా కౌగిలించుకున్నాడు. అక్కడున్న వాళ్ళందరూ చిన్నగా చప్పట్లు చరిచారు.
హార్ధిక్ మొహంలో చిన్న చిరునవ్వు, కాస్త సంతోషం చోటు చేసుకున్నాయి. తన తండ్రి ఏ విషయమైనా చెప్పడమే కానీ మాట్లాడటం, పొగడటం అనేవి జీవితంలో మొదటిసారి అనుభూతి చెందాడు హార్ధిక్.
“మరి నాకు కావలిసిన వస్తువులు?” సందేహం వెలిబుచ్చాడు మల్హోత్రా.
“సూపర్ కంప్యూటర్ తయారీ కానీ కొనుగోలు కానీ అసాధ్యం. ఇప్పుడు మనమున్న పరిస్థితుల్లో అవి చేజిక్కించుకునే మార్గం ఉంది. కానీ అవన్నీ ఒకేసారి తీసుకోవాలి. మీకు ఏం కావాలో, అవసరమో, అవసరం అవుతాయి అనుకుంటున్నారో అన్నీ ఒకేసారి లిస్ట్ రాసి ఇవ్వండి. అవి రప్పించే బాధ్యత నాది. కానీ రెండోసారి మాత్రం ఇది కావాలి అని నన్నడక్కూడదు. ” హెచ్చరించినట్టు చెప్పాడు హార్ధిక్.
“ఎలా తీసుకొస్తావ్ హార్ధిక్?” అనుమానంగా ప్రశ్నించాడు సౌరవ్.
“తీసుకొస్తాను. కానీ అసలు మన దేశంలో సూపర్ కంప్యూటర్ల వివరాలు కావాలి నాకు” అంటూ మల్హోత్రా వైపు చూసాడు హార్ధిక్.
ఆ ప్రశ్న కోసమే ఎదురుచూస్తున్నట్టు మల్హోత్రా కళ్ళజోడు సవరించుకుంటూ “మనదేశంలో మొత్తం 9 సూపర్ కంప్యూటర్లు ఉన్నాయ్. అందులో అన్నీ ఏదొక ప్రభుత్వ అవసరాల కోసం పని చేస్తున్నాయి. కానీ టాటా గ్రూప్ వాళ్ళు EKA అనే సూపర్ కంప్యూటర్ తయారు చేశారు. దానిని డెవలప్ చేసే క్రమంలో వాళ్ళు మొదటగా తయారుచేసిన ‘దక్షిణి’ అనే సూపర్ కంప్యూటర్ ని పక్కన పెట్టేసారు. అది 80teraflop/s స్పీడ్ తో పనిచేస్తుంది. EKA తో పోల్చుకుంటే అది 56teraflops తక్కువ. మనకు మాత్రం ఆ స్పీడ్ చాలా ఎక్కువ. ప్రస్తుతం అది ఒక్కటి మాత్రమే మనం సొంతం చేసుకోగలిగిన సూపర్ కంప్యూటర్” తన వివరణ పూర్తి చేశాడు మల్హోత్రా.
“ఇక నీదే బాధ్యత ” అన్నట్టు సౌరవ్ వైపు తిరిగి భుజాలు ఎగరేశాడు హార్ధిక్.
“టాటా సన్స్ మనకు బాగానే సహాయపడతారు. ఫ్యాన్సీ అమౌంట్ ఇస్తే అది మన సొంతం కావడం పెద్ద విషయం కాదు. మిగిలిన వస్తువుల గురించి ఏం ఆలోచించావ్ హార్ధిక్” అడిగాడు సౌరవ్.
“విషయం చాలా సింపుల్. మల్హోత్రా ఇచ్చిన లిస్ట్ లో మనకు దొరికే వస్తువులను ఇండియన్ ఆర్మీలో నేను సంపాదిస్తాను. దొరకని వాటి సంగతి ఆస్ట్రియా ఆర్మీలో మీ సంబంధాలు ఉపయోగించి మీరే తీసుకురావాలి” చెప్పాడు హార్ధిక్.
“సరే మల్హోత్రాకు కావలిసిన మనుషుల సంగతి చూడు” చెప్పాడు సౌరవ్.
హార్ధిక్ హాథీని పిలిచి ” రేపు అన్ని పేపర్స్ లో ఒక కొత్త కంపెనీ పేరు మీద 25వేల జీతానికి అన్ని బ్రాంచుల ఇంజనీర్స్ కి ఇంటర్వ్యూ ఉందని ప్రకటన ఇవ్వు. దాని కింద 20వేలకు అన్ని బ్రాంచుల డిప్లమో వాళ్లకు ఇంటర్వ్యూ ఉందని ప్రకటన ఇవ్వు. మన సంపత్ వాళ్ళ ఫార్మ్ హౌస్ లో ఇంటర్వ్యూ ఏర్పాటు చెయ్” ఆదేశించాడు హార్ధిక్.
“సర్?” అన్నాడు హాథీ.